(१) केंद्र सरकार या अधिनियमाखालील आपली कार्ये कार्यक्षमतेने पार पाडण्यासाठी केंद्रीय प्राधिकरणाला आवश्यक वाटतील इतके अधिकारी आणि इतर कर्मचारी उपलब्ध करून देईल.

(२) या अधिनियमाखाली नियुक्त केलेल्या केंद्रीय प्राधिकरणाचे अधिकारी आणि इतर कर्मचारी यांना देय असलेले वेतन आणि भत्ते, तसेच त्यांच्या सेवेच्या इतर अटी व शर्ती, विहित केल्याप्रमाणे असतील.

(३) केंद्रीय प्राधिकरण, विनियमांद्वारे विनिर्दिष्ट केलेल्या कार्यपद्धतीनुसार, ग्राहक हक्क आणि कल्याण, ग्राहक धोरण, विधि, वैद्यकशास्त्र, अन्न सुरक्षा, आरोग्य, अभियांत्रिकी, उत्पादन सुरक्षा, वाणिज्य, अर्थशास्त्र, सार्वजनिक व्यवहार किंवा प्रशासन या क्षेत्रांमध्ये विशेष ज्ञान व अनुभव असलेले, तसेच सचोटी व क्षमता असलेले, जेवढे तज्ञ आणि व्यावसायिक तिला या अधिनियमाखालील तिची कार्ये पार पाडण्यासाठी साहाय्य करण्याकरिता आवश्यक वाटतील, तेवढ्या संख्येने नियुक्त करू शकेल.