(1) కేంద్ర ప్రాధికార సంస్థ, కేంద్ర ప్రభుత్వం నుండి ఏదైనా సమాచారం లేదా ఫిర్యాదు లేదా ఆదేశాలు అందిన తర్వాత లేదా స్వయంగా, ఏదైనా వ్యక్తిచే వినియోగదారుల హక్కుల ఉల్లంఘన లేదా ఏదైనా అన్యాయమైన వ్యాపార పద్ధతి లేదా ఏదైనా తప్పుడు లేదా తప్పుదోవ పట్టించే ప్రకటన, అది ప్రజా ప్రయోజనాలకు లేదా వినియోగదారుల ప్రయోజనాలకు హానికరం అయినట్లయితే, దానికి సంబంధించిన ప్రథమదృష్టిలో కేసు ఉందా లేదా అని ప్రాథమిక విచారణను నిర్వహించవచ్చు లేదా నిర్వహించబడేలా చేయవచ్చు మరియు ప్రథమదృష్టిలో కేసు ఉందని అది సంతృప్తి చెందినట్లయితే, అది డైరెక్టర్-జనరల్ లేదా జిల్లా కలెక్టర్ ద్వారా దర్యాప్తు చేయించవలెను.

(2) ప్రాథమిక విచారణ అనంతరం, ఆ విషయం ఆ సమయానికి అమలులో ఉన్న మరేదైనా ఇతర చట్టం క్రింద స్థాపించబడిన ఒక నియంత్రణ సంస్థచే పరిష్కరించబడవలసి ఉన్నదని కేంద్ర ప్రాధికార సంస్థ అభిప్రాయపడినట్లయితే, అది అట్టి విషయాన్ని సంబంధిత నియంత్రణ సంస్థకు తన నివేదికతో సహా పంపవచ్చు.

(3) ఉప-సెక్షన్ (1) క్రింద విచారణ నిమిత్తం, కేంద్ర ప్రాధికార సంస్థ, డైరెక్టర్ జనరల్ లేదా జిల్లా కలెక్టర్ ఉప-సెక్షన్ (1) లో పేర్కొన్న వ్యక్తిని ఆహ్వానించవచ్చు మరియు అతని స్వాధీనంలో ఉన్న ఏదైనా పత్రం లేదా రికార్డును సమర్పించవలసిందిగా కూడా ఆదేశించవచ్చు.